Sharaǵa Mádenıet jáne sport vıse-mınıstri Erlan Qojaǵapanov, týrızm salasy boıynsha zań jobasyn ázirlegen toptyń jetekshisi Gúlnara Qurbanbaeva, shtabtyń úılestirýshisi Erkebulan Hasenov, t.b. jaýapty mamandar qatysyp, elimizde týrızmdi damytýdyń keleli máseleleri boıynsha pikirtalas ótkizdi.
Búginde el ekonomıkasynyń draıveri retinde damý baǵdaryn ustanyp otyrǵan sala keshendi ózgeristerdi qajet etedi. Mamandar pikirinshe, ishki jáne syrtqy týrızmdi damytýda elimizde múmkindik molynan. Qazaqstan tabıǵı tartymdylyǵy, ishki turaqty jaǵdaılarymen kez kelgen saıahatshy úshin qaýipsiz aýmaq bolyp tabylady.
Osy oraıda Mádenıet jáne sport vıse-mınıstri Erlan Qojaǵapanov kez kelgen týrıst birinshiden, saıahatshylap keletin el týraly keńinen málimet alýdy qarastyrady. Osy turǵydan alǵanda Qazaqstan tabıǵaty elimizge saıahattap keletin týrıst úshin tartymdy aımaq. Memleket basshysy atap ótkenindeı, bizde orman da, kól de, teńiz ben dala da barshylyq. Mine, osynaý keremet baılyqty ózgelerge kórsetý úshin barlyq múmkindikterdi qarastyrýymyz qajet, dedi.
Sala mamandarynyń pikirtalasyn týǵyzǵan týrızm máselesine qatysty joba 2023 jylǵa qaraı JIО́ týrızmniń úlesin kem degende 8 paıyzǵa jetkizýdi kózdeıdi. Týrıstik resýrstardy damytý, týrıstik destınasııalardyń jáne nysandardyń kóliktik qoljetimdiligin qamtamasyz etý, týrıstik ónimderdiń jáne qyzmetterdiń sapasyn, qoljetimdiligin arttyrý, qolaıly týrıstik orta júıesin túzý, ishki jáne halyqaralyq naryqtarda eldiń týrıstik áleýetin arttyrý, týrıstik salany basqarý jáne damýyn monıtorıngileý júıesin jetildirý sııaqty keshendi máseleler sheshimin tabýǵa tıisti. Al 2023 jylǵa qaraı elimizge keletin týrıster sanyn 9 mln, al kirme týrızmdegi úlesin 3 mln, ishki týrıstterdi 8 mln adamǵa jetkizýdi kózdeıdi. Munymen qatar týrızm salasynda jumys isteıtinder 650 myńǵa jetýi tıis. Osyndaı maqsatty mindetterdi qarastyryp otyrǵan joba aıasynda marketıng pen brendıngti, ınfraqurylymdardy damytýdyń mańyzy zor.
Elvıra Serikqyzy,
«Egemen Qazaqstan»
ALMATY
